من الادب الساخر 1

صابر- وادي الاوراق اللي حضرتك طلبتها مني عشان تركيب عداد في الشقة الجديدة يا باشمهندس

مهندس = (يفحص الاوراق )

صابر – ممكن تديني تصريح بقي عشان اروح بيه هيئة الكهرباء ؟

مهندس= ما نقدرش نديلك تصريح بتركيب عداد قبل ما تدفع الكهرباء اللي عليك الاول

-( يفتح فمه في دهشة ) كهربا؟! جت منين ؟! دانا لسة جاي اهو عشان اركب عداد و ادخل الكهربا في الشقة

= كل سكان المدينة قالواكده و بعدين اتضح انهم كانوا بيسحبوا كهربا من العمومي للشقق بتاعتهم ينوروها و يشغلوا بيها التلاجات و المكيفات و التلفزيونات – هيئة الكهربا بالقاهرة بتطالب جهاز المدينة بعشرين مليون جنيه تمن الكهربا اللي اتسرقت في السنتين اللي فاتوا

- بس انا بالذات ما سحبتش و لا سنتي كهربا

= ما هي كانت قدامك

- يعني كان لازم ارتكب مخالفة زيهم ؟؟!

=ما انت كده و لا كده هتدفع و علي العموم هو مبلغ تافه بالنسبة للشقة اللي فزت بيها في الحي المتميز في مدينة جديده و شرحه زي دي مطلوب منك ثلاثين جنيه متوسط كل شهر اضرب في سنتين يبقي 720 جنيه بس

-انا معترض

= اعترض يا حبيبي زي ما انت عاوز بس ادفع الاول و بعدين اعترض للصبح

صابرلا يجد بدا من دفع المبلغ لكي يتمكن من تركيب عداد الكهرباء فيتجه الي ادارة الحسابات بجهاز المدينة و يقدم المبلغ للموظف المسئول عن الكهرباء فيرفض استلامه فيندهش صابر للامر و يساله :

- ليه

= لما تدفع المية اللي عليك الاول

- (مصعوقا ) ايه؟!!

= الميه

- مية ايه / دانا لسة ماسكنتش

= هيئة المياه بتطالب جهاز المدينة بخمسة مليون جنيه

- لازم عشان الجناين و النافورات اللي في حوش المبني بتاع جهاز المدينة انما انا شخصيا ما استعملتش نقطة ميه

= ما هي كانت قدامك

- انا معترض

= و ماله اعترض علي كيفك بس ادفع الاول

- يعني لازم ادفع المية عشان اقدر ادفع الكهربا عشان اقدر اركب عداد؟!!

= اسم الله عليك عالعموم المبلغ لما يتقسم علي سكان المدينة حايبقي نصيب كل واحد تافه اوي

-امري لله

(و يتجه صابر للموظف المسؤول عن تحصيل فواتير المياه و يقدم المبلغ فيرفض استلامه )

- ليه ؟!!

= عندنا تعليمات انك لازم تدفع فاتورة التليفون الاول

- ( مصعوقا ) تليفون ؟!!

= عندك مكالمات زيادة بمية و عشرين جنيه

- طيب ايه رايك بقي انا معنديش تليفون خالص

= كل سكان المدينة قالوا كده برضه

- هيه ؟ و اتضح بعدين ان عندهم تليفونات و مخبينها تحت السرير ؟

= لأ معندهومش تليفونات لكن بيستعملوا تليفونات الشارع اللي بالعملة

-يبقي حق التليفونات مدفوع اول باول اهو

= لأ ماحدش فيهم كان بيحط عملة خالص اصل فيه لعبة معينة ممكن الواحد يعملها في زراير الجهاز تقوم تجي الحرارة و يتكلم بدون مايحط عملة و يتكلم مكالمات عادية و نداء الي كمان فكلهم عرفوا اللعبة دي و بقوا يستعملوها

- يا ولاد الايه ؟!! و الله براوه عليهم

= هيئة التليفونات بتطالب جهاز المدينة بثلاثة مليون جنيه مكالمات زيادة و المبلغ ده لما يتقسم علي سكان المدينة حايبقي نصيب كل عين تافه جدا لكن فيه معني اجتماعي عظيم جدا و هو الاحساس بالمساركة و الانتماء

- بس انا ماستعملتش تليفونات الشارع دي نهائي

= الله !! ما هي كانت قدامك

-ما عرفش اعمل اللعبة اللي بيعملوها

= فيها ايه دي تعرفها تعرفها متعرفهاش هتدفع

- يعني لازم ادفع فاتورة تليفون وهمية عشان يقبلوا مني فلوس مية وهمية عشان يقبلوا فلوس كهربا وهمية عشان يقبلوا يركبوا لي عداد انا معترض معترض معترض

= ادفع ادفع ادفع و بعدين اعترض اعترض اعترض

( صابر يشعر بالقهر و الغيظ فيصحو مارد الكرامة بداخله و يصر علي اثبات هذه الحالة الشاذة و يقدم نفسه للضابط ):

صابر- انا ساكن جديد و عندي شقة تمليك في المدينة الجميلة دي

ضابط = (يلتفت مناديا ) حطه في الحجز يا عسكري

صابر – ايه!! فيه ايه؟!

ضابط= يعني مانتش عارف يا حرامي يا لص ؟!

صابر – انت ازاي تقولي يا لص ؟! انا لص !! طيب سرقت ايه ؟!

ضابط= حاتستعبط ؟!! السرقات الضخمة اللي حصلت في جهاز المدينة طول السنين اللس فاتوا خمسين مليون جنيه يا نور

صابر – لا هو جهاز المدينة حصلت فيه سرقات ؟!! انا اول مرة اعرف الحكاية دي؟!!

ضابط= ما كل الموظفين بتوع الجهاز و سكان المدينة قالوا كده في الاول و بعدين اتضح انهم عصابة كبيرة و انت علي راسها ده كل من هب و دب كان بيهلب من جهاز المدينة شئ و شويات

صابر – الا انا و الله

ضابط = فحطيناهم كلهم في الحجز

صابر – اقسم بالله العظيم ثلاثة اني انا برئ

ضابط= ماتتعبش قلبي و فوت قدامي عالحجز

صابر – انا ما سرقتش حاجة من الجهاز و اوعي تقولي لي

ضابط و صابر -= ( في وقت واحد معا ) ما هو كان قدامك

[color:900f=fuchsia:900f]يقع صابرمغشيا عليه

[color:900f=fuchsia:900f]( طبق الاصل )