Admin
Admin
عدد الرسائل : 1847
تاريخ التسجيل : 29/08/2007
 |  موضوع: من الادب الساخر 2  الأحد سبتمبر 09, 2007 5:17 pm | |
| سوق الكلاوي
د. حازم – الكليتين عندك توقفوا عن العمل تماما
نعيم = و الحل؟!
- ح تحتاج غسيل دم مرتين في الاسبوع
( يواظب نعيم علي الغسيل و يتحمل الاما كثيرة و لكن الحالة تزداد سوءا )
- لا مفر من زرع كلية
= و حاجيبها منين؟!
- انت موش لك اخوات ؟
= اربعة
- أي حد فيهم يتبرع لك بكلية يا اخي
( نعيم يقابل شقيقه الاكبر فهيم )
فهيم- دانا عينيه اديها ليك يا ابن امي و ابويا بس انا كبرت في السن دلوقتي و صحتي علي قدي ما تستحملش عملية جراحية عارف مين اللي ينفعك في الحكاية دي و يفديك برقبته
نعيم = مين ؟!
فهيم – اخوك سليم
سليم- هو انا انسي يوم ما شلت الاعور و ماحدش فيكم سال فيا ؟!!
نعيم= ما احنا واقفين جنبك كلنا !!
- و عملت بيكم ايه ؟! حد فيكم اتبرع بالاعور بتاعه ؟! كلكم ساعتها اديتوها الطارشة اديني عايش من يومها ع الحركرك من غير اعور بس ربك هو اللي بيستر
= و انت هتعوز اعور ليه ؟!
- انا حر فيه يا اخي ابيعه اخيطه في الامعاء اعمله ساندويش احنطه و اشيله أي حاجة بس احس انكم عندكم استعداد للعطاء و من قدم اعور السبت يلاقي كلية يوم الحد
= افهم من كده انك بترفض تديني كلية ؟
- اسمع ما تشوف اخوك نظيم
نظيم – و هو يبسمل و يحوقل في و بيده مسبحة طويلة : لا اله الا الله و لا حول و لا قوة الا بالله
نعيم= قلت ايه يا نظيم
- (صائحا ) : اعوذ بالله من غضب اللهىاعوذبالله من غضب الله اعلم ان جسمي لا املك منه شيئا فهو مجرد امانة و لا يملكه سوي خالقه و ما جسم الانسان الا وعاء ابدعه الله ليودع فيه الروح فيحيا بها و يسترده حين ياتي اجله و قد امرنا سبحانه و تعالي ان نحافظ علي هذه الامانة حتي نسلمها لخالقها كما ابدعها في احسن صورة لا تنقصها كلية و لا اصبع و لا ظفر صغير كيف لي بالله ان اقابل ربي و انا متهم بتبديد العهدة ؟ّ!
= من غير كلية حاموت يا نظيم ؟
- يبقي عمرك انتهي كما هو مبين في اللوح المكتوب و فزت بها قبلنا جميعا واسعداه واهناه وافرحتاه
= ( باكيا ) : وامصيبتاه
(لم يبقي سوي شقيقته العانس محدوده الجمال (تفيدة ) يذهب اليها نعيم فتنفجر باكية و هي تضمه اليها في لهفة و حنان)
تفيدة – دانا افديك بروحي يا خويا
نعيم = انتي اللي فيهم يا تفيدة من يوم ما ماتت المرحومة و انت كنت لي اخت و ام و اب و كل شئ في الدنيا حافضل طول عمري مديون لكي بحياتي بفضل الكلية اللي ح تديها لي \
- ما تقولش كده يا نعيم دي حتة كلية لا طلعت و لانزلت
( تجري تفيدة التحليلات المطلوبة في المستشفي اشعات التراساوند سرعة الترسيب الانسجة و فصيلة الدم التي يتضح انها من النوع النادر (o) )
د.حازم – كله ايه وان يا استاذ نعيم جسمك هيتقبل كلية اختك بسهولة و موش هيطردها و للعلم هي فصيلة دمها اوه نيجاتيف اللي ممكن تدي لجميع الفصائل الدم التانية
نعيم = يعني امتي ممكن نعمل العملية ؟
د.حازم- يومين تلاتة بالكتير
( توضع تفيدة في المستشفي تحت الرعاية و الملاحظة الي ان تاتي ليلة العملية فيتجمع الاخوة الاربعة حول سريرها و هم يبثونها اسمي ايات الشكر و التقدير لهذه التضحية العظيمة فترد تفيدة قائلة ):
-تفيدة : خلوا بالكوا ان انا بانوب عنكم كلكم في اعطاء كليتي لاخونا نعيم
الاخوة = (منتهى النبل ) (جميل موش حاننساهولك طول العمر )
- و دي معناها اني ح اعيش بقي عمري بكلية واحدة
= و لا يهمك الدكتور قال ان الانسان ممكن يعيش طبيعي جدا بربع كلية كمان
- طيب علي فرض ان الكلية اللي حيلتي دي جرالها حاجة ؟!
=(بعد الشر ) ( ان شاء الله موش حايحصل )
-انا بقول نفرض يعني بلاش دي مش انا مسيري اتجوز و اخلف؟
= ( ينظرون لها في استهجان مستتر و يضحك بعضهم في كمه )
- و موش احتمال و لو واحد في المليون ان ابني ضنايا ده ييجي له فشل كلوي ؟! اهوه ساعتها لو حبيت اتبرع له بكلية عشان انقذ حياته مش حاقدر ادي كليتي الوحيدة اللي فاضلة طبعا
=(دانت خيالك سرح لبعيد اوي) ( بلاش التشاؤم ده )
- ع العموم لو حصل ده بعد الشر فالحل موجود برضه اشتري له كلية الفلوس بتحل كل حاجة
= (بس دي بتعوز فلوس كتير اوي )(حتجيبي منين ) (ع العموم ربنا يرزقك)
- ما هو ح يرزقني بس عن طريقكم انتوا
=(ازاي) (موش فاهمين )
- بيت الجمالية كل واحد فيكم انتوا الاربعة يتنازل لي دلوقتي حالا عن نصيبه فيه
نعيم – انا مستعد
سليم- انتي بتقولي ايه يا تفيدة ؟
فهيم – انا و ولادي اولي بالعشرين الف جنيه نصيبي في البيت
نظيم – حاشا لله ان افرط في حق اعطانية الله \
تفيدة – ما هو لازم يكون فيه مبلغ تحت ايدي عشان لو جري لي او لحد من ولادي حاجة يبقي سند لي
سليم – و احنا رحنا فين يا تفيدة ؟
نظيم – كلنا سند لك يا اخت تفيدة
فهيم – احنا عمرنا اتاخرنا ؟.
تفيدة – الشهادة لله انتوا ما بتتاخروش ابدا لانكم مابتجبوش اصلا
فهيم – شيلي من مخك حكاية بيت الجمالية ده
نظيم – تنازلي يعني كفري بنعمة انعم بها الله علي
سليم – ده حق ولادي
تفيدة – حيث كده انا معنديش كلية لحد
نظيم – خسئت انك بذلك تقتلين اخاكي
تفيدة – و هو اخويا انا لوحدي ما هو اخوكم انتو كمان
( و تقفز تفيده من سريرها و تندفع مغادرة المستشفي بين نظرات الذهول علي وجوه الاخوة الثلاثة و عبرات الاسي و المرارة تقطر من عيني نعيم )
[color=red]د.حازم-اخص
نعيم= و الحل ؟
-نشتري كلية
= بكام دي؟
- ما بين عشرين و ثلاثين الف جنيه معاك تدفع؟
= ايوة نصيبي و نصيب اختي يغطوا المبلغ تفيدة عندها استعداد تسلفني نصيبها
( ينشر الاعلان في الصحف و يبدا توافد المتبرعين و تقابل تفيده المتبرع الاول)
-اخويا هيدفع لك عشرين الف جنيه
= ده بالضبط المبلغ اللي محتاجه عشان علاج والدتي
- نبقي متفقين
( و يتم عمل التحليلات اللازمة لتحديد فصيلة الدم و الانسجة فيتضح انها خالفة فيصرف النظر عنه )
(ياتي دور المتبرع التاني و هو شاب في مقتبل العمر يدخل مصطحبا خطيبته )
خطيبته- انا موش ممكن ابيع كلية حبيبي باقل من 30 الف جنيه
تفيدة – ليه ؟
خطيبته- لان ده يا دوب المبلغ اللي حندفع منه خلو الشقة و اجرة شهرين مقدم و نجهز اودة و مطبخ
خطيب- بقي لنا سبع سنين مخطوبين موش عارفين نتجوز
تفيدة – اخركلام في الكلية 25 الف جنيه
خطيبته – (في فرح شديد)صحيح؟
خطيب – يا عالم بالحال يا رب
خطيبته – باقول لك يا حمادة ما تبيع الكلية التانية و نجيب العربية
(تثبت التحليلات عدم ملائمة فصيلة دم و انسجة هذا المتبرع ايضا فيخرج محسورا و هو يجر خطيبته المنهارة جرا )
( يتم رفض عدد اخر من المتبرعين لعدم ملائمة خاصة فصيلة الدم نعيم نادرة الي ان يصل المتبرع حنورة الذي اتضح ان دمه من الفصيلة النادرة نفسها )
حنورة (صائحا ) لأ فلوس لأ
تفيدة – دانت ح تقطع كلوة من لحمك و تديها لاخويا
-و لو --- انا بنقذ حياة اخ لي في الانسانية --- اقوم اخذ قصاده كده مقابل؟! اعوذ بالله
= امال ح تعرض نفسك للخطر ببلاش
-ح تبقي فلوس حرام و ما اقدرش اقبلها علي بيتي و ولادي
= خلاص احنا موافقين ناخد الكلية مجانا بس قصاد التضحية و الخدمة الانسانية اللي ح تعملها ح ندي لك هدية صغيرة
-اه اذا كان هدية علي سبيل التذكار معلش
= عشرين الف جنية
- ما تخليها 40 الف
=( و قد فوجئت ) ايه ؟
- عشان تبقي هدية قيمة اقوم افتكرها دايما
=هم ثلاثين الف مفيش غيرهم
- زي بعضه بس خليكي فاكرة ده موش ثمن ده عبارة عن هدية تذكارية سوفينير يعني لكن حاشا لله اني ابيع أي عضو من اعضاء جسمي في نظير فلوس اعوذ بالله
دواهي – زوجة حنورة – تقبل عليه في بشاشة قائلة :
| |
|
Admin
Admin
عدد الرسائل : 1847
تاريخ التسجيل : 29/08/2007
| | موضوع: رد: من الادب الساخر 2 الأحد سبتمبر 09, 2007 5:18 pm | |
|
- خمسة و عشرين الف للدكان اللي ح ناجرة و خمس تلاف نشتري بيهم بضاعة نحطها فيه يبقوا الثلاثين الف
-ياللا خلينا نشوف مستقبلنا و مستقبل العيال بقي بدل الشحططه بتاعة التاكسي اللي بتشتغل عليه و موش جايب همه ده
( في اثناء استكمال الاختبارات الاولية يتردد حنورة و دواهي علي منزل نعيم و تفيدة في زيارات تبدو بريئة )
حنورة – دانا و انت ح نبقي شخص واحد ياسي نعيم
دواهي – طبعا الكليتين التوأمين الاختين الحلوين هناء و شيرين واحدة في حنورة و التانية في سي نعيم ( ينفجرون من الضحك )
نعيم – فعلا عندي احساس كده ان انا و انت ح نبقي زي فولة و انقسمت نصين
حنورة – احساس جميل مفيش فرق خالص دي كلوتي دي كلوتك دي كبدتي دي كبدتك دي فشتي دي فشتك
دواهي – (تكمل و هي تغني ) خايفة لا روح في سكتك ( يضحكون )
حنورة – هاها ده طحالي ده طحالك تلفزيوني ( يشير الي جهاز التلفزيون ) ده تلفزيونك واحد
دواهي – علي فكرة يا سي نعيم تتصور حضرتك ان العيال ما عندهمش تلفزيون ؟ بتاعكم صورته ناطقة اوي
تفيدة – قصدك ايه ؟
نعيم- ادي لهم التليفزيون ؟
تفيدة – ( في استنكار ) نعم نعم!!
دواهي – ( تشهق و تضرب علي صدرها ) ياختي زعلتي احنا متاسفين يا حبيبتي ياللا بينا يا حنورة
( وتخرج دواهي و بيدها حنورة غاضبين )
د. حازم – رسم قلب اختبار سرعة ترسيب سكر كوليسترول دهنيات الدم كله لورمال اوعوا تسيبوا الراجل ده
( تفيدة تهرول الي منزل دواهي و حنورة و معها التلفزيون المطلوب و تعتذر لها ) فتبادرها دواهي قائلة :
- العملية خطرة و ما حدش ضامن الموت من الحيا موش يمكن جوزي حنورة يروح فيها
= احنا موش اتفقنا خلاص
- ايوة بس هو بصراحة عاوز يروح يودع اهله قبل العملية
=طيب ما يروح
- ح يجيب منين؟
=هما اهله دول فين ؟
- في اسكندرية
= ايه؟؟
( و تدفع تفيدة مضطرة مبلغا من المال كبدل سفر خارج اتفاق الثلاثين اف فيستغل المذكوران المبلغ في قضاء يومين مع الاولاد في اسكندرية )
حنورة – هاهاها اما حتة فسحة ما كنتش علي البال
دواهي – لولا الكلاوي ما كناش شفنا اسكندرية دي خالص
حنورة – (يهتف ) بص شوف الكلاوي بتعمل ايه هاهاها
دواهي – انا انده العيال بقي عشان يطلعوا من البحر
حنورة – يا دوب عشان نلحق السمك و الجمبري في ابو قير
د.حازم- عملنا له اختبار موجات فوق صوتية التراساوند و سليم مية مية
نعيم – واضح ان ربنا بيحبني
(دواهي و نعيم في زيارة لنعيم و تفيدة )
دواهي – الشتا قرب و العيال عوزين يتكسوا
تفيدة – مفيش
دواهي – يلا بينا يا حنورة
نعيم – استني بس ياست دواهي
تفيدة – انتوا ح تبيعوا فينا و تشتروا و لا ايه ؟
دواهي – بلاش ياختي احنا لسة ع البر بينا يا درويش
نعيم – ما نتفاهم بالهداوة يا جماعة
درويش- احنا كل اللي عاوزينه دفعة تحت الحساب
تفيدة – مافيش و لا مليم لحاد ما العملية تنتهي
دواهي – و العيال ذنبهم ايه يقعدوا عريانين لحاد العملية تنتهي
نعيم – اديها تجيب كسوة العيال يا تفيدة
تفيدة اففف---- انا زهقت
نعيم – عشان خاطري
تفيدة – حاضر
درويش – انا
دواهي – عاوز ايه ؟
درويش – نفسي في جزمة بتنور
( و ياتي يوم العملية و يفاجأ الدكتور حازم بمساعدة الدكور مرسي ينقل خبرا مزعجا )
- نتيجة اختبار البول للسايتولوجي وصلت دلوقتي من المعمل الراجل اللي اسمه حنورة ده عنده حاجة في الكلي
= اعملوا اشعة للكليتين فورا
( دواهي تكاد تسقط من طولها و هي تستمع للدكتور حازم و هو يقول لها ):
- الكلية اليمين بتاعة جوزك بايظة خالص
= طيب و الشمال
-سليمة
= خلاص انقلوها للاستاذ نعيم
- موش ممكن جوزك ما يقدرش يعيش ع الكلية المصابة
=(تبكي) : عليه العوض و منه العوض
تفيدة – ( مصعوقة ) طيب و العمل يا دكتور حازم ؟!
د.حازم = لازم ندور علي متبرع تاني
- و الصرف اللي صرفناه دا كله علي اللي ميتسماش ده و مراته ؟!!
= استعوضوا ربنا فيه كفاية الصدمة اللي حصلت له
( اما في منزل حنورة فان دواهي تكاد تفتك به و هي تصيح فيه ): دانت نحس فقري تبقي بكلية و كلية و انا معرفش ؟!
- و انا ذنبي ايه ؟!
= خدعتني و خدعت اهلي لما انتوا موش اد النيلة بتتنيلوا ليه ؟ لما انتو بكلية واحدة بتميلوا بخت بنات الناس معاكم ليه ؟
- المهم اننا نعالج الكلية دي قبل ما تعفن
= نعالجها منين ؟موش كفاية ضيعت علينا ثلاثين اف جنيه !!
- و انا كان علمي
=(و قد ابرقت عيناها في خبث ) :لأ ما ضاعوش
- ايه ح تديهم كلوتك انتي
= اتلهي اسمع احنا نلم الثلاثين الف برضه و ح نفتح المحل بس بالتقسيط المريح
- ازاي؟!
= ح اقولك ازاي
(و يجد نعيم متبرعا اخر سليم الكلاوي و من فصيلته نفسها و يستعدان لاجراء عملية زرع الكلية بينما دواهي و حنورة ينطلقان الي عالم الكلاوي الفسيح )
دواهي – فيه واحد عامل اعلان في الجورنال اهو طالب كلية
حنورة = بكام ؟!
-عشرين الف جنيه
= يعملوا ايه
- هو انت حاتقبض منهم؟! انت ناس ان البضاعة بتاعتك مضروبة قوم بينا
(دواهي و حنورة يقابلان المريض و طبيبه الخاص )
مريض – يعني موافقين علي العشرين الف ؟!
دواهي – احنا الفلوس اخر حاجة نفكر فيها
حنورة – انا المهم عندي اني اعمل عمل انساني
مريض – (باكيا من فرط التاثر ) معقول فيه ناس بالاخلاق دي في الزمن ده ؟
حنورة – و لسة قدام شوية لما تتكشف اخلاقنا علي حقيقتها
دواهي (هامسة ) : اسكت بلاش فضايح
طبيب – من بكرة نبتدي التحاليل و اختبارات القلب و المخ
دواهي – طيب ممكن مبلغ بسيط من تحت الحساب ؟!
حنورة – و لو حتي الفين جنيه نسيبهم في البيت عشان اتفرغ للمستشفي بقي
طبيب- لما تثبت الاختبارات المعملية ان الفصيلة متطابقة معاه ح اقول لاهله يصرفوا لكم العربون ده
( تنجح التحليلات و تصرف دواهي الالفين جنيه و ياتي يوم العملية فيفاجي الطبيب دواهي بالخبر الخطير )
- خبر يا دكتور ؟
= بس ماتتخضيش الكلية اليمين عند جوزك حنورة متهرئة تماما
-( تتظاهر بالصدمة فتشهق بقوة ) : صدمة
-يعني موش ح تعملوا العملية و تاخدوا منه الكلية ؟!
= ما نقدرش بس المهم تعالجوا الكلية دي باسرع ما يمكن
- (باكية ) منين يا دكتور ده حتي الالفين جنيه اللي خدناهم اتصرفوا خلاص
= ما افتكرش ان اهل المريض ح يطالبوكم بيهم ربنا معاكم
( في المنزل ينفجر حنورة و دواهي بالضحك )
دواهي – رزق الهبل ع المجانين هاهاها
حنورة – اما انتي عليكي افكار صدق من سماكي دواهي اصلك موش داهية واحدة دانت دواهي
دواهي – فيه اعلان في الجرنال اعلان اهوه زبون جديد طالب كلية
( دواهي و حنورة يقابلان الزبون الجديد )
زبون- ما اقدرش ادفع غير 15 الف
حنورة – زي بعضه
دواهي – بس يا ريت نقبض 3 الاف تحت الحساب
زبون – اول ما الدكتور يقول ان التحليلات سليمة حاقبضكم العربون
( يتم المطلوب و ياتي يوم العملية و يهرع احد افراد طاقم الجراحة الي دواهي ):
جراح- يا ست دواهي دواهي –(تشهق):صدمة
| |
|
Admin
Admin
عدد الرسائل : 1847
تاريخ التسجيل : 29/08/2007
| | موضوع: رد: من الادب الساخر 2 الأحد سبتمبر 09, 2007 5:19 pm | |
|
جراح- ايش عرفك ؟
دواهي – (مرتبكة ) ق ق قلبي حاسس
جراح – ده صحيح الاشعة اثبتت ان كليته اليمين متبهدلة
دواهي –(باكية ) : يعني الفلوس اللي قبضناها ح نصرفها علي علاجه هو ( تنفجر باكية )
( في منزل دواهي و حنورة ينفجران بالضحك و هما يحصيان المبالغ التي تم تحيلها حتي تاريخه)
حنورة – عرفت النهارده ان فيه مريض من الخليج عاوز كلية و ح يدفع بالعملة الصعبة
دواهي – اعداني ع الدولار
و تستمر اللعبة
حنورة – هانت
( يفاجأ الدكتور حازم ذات يوم بتفيدة تدخل عليه و قد بدا عليها سوء الحال و البهدلة و قلة الشئ و تذكرة بنفسها و تقص عليه ما كان ن امرها مع اخوتها الاربعة )
تفيدة- اللي مسافر و اللي اختفي لما عرف اني محتاجة له بعد ما بعت نصيبي في البيت و بقيت ع الحديدة
د.حازم – و نعيم ؟
- بعد ما العملية نجحت هرب عشان مايردليش المبلغ
= ما اتجوزتيش؟
-حصل و مات بعد شهرين
= و ساب لك حاجة ؟!
- اه ساب لي عيل في بطني
= يااه دي الدنيا لطشت معاكي امال عايشة ازاي ؟ بتصرفي منين ؟
- ما انا جاية لحضلاتك عشان كده محتاجة مبلغ يبقي خميرة اشغلها و اربي الواد بالربح بتاعها
= ايوة بس انا
- لا ماتفهمنيش غلط انا جاية لك بصفتك دكتور و بييجي لك عيانين عاوزين يشتروا كلية موش كده ؟!
= ايوة
-انا عاوزة ابيع كلية
= ايه!!
- ايوة و سعادتك عارف ان فصيلة دمي من النوع النادر
= ( مفكرا ) ربنا يسهل
( تسير خطط دواهي كما رسمتها بالضبط )
حنورة – موش خلاص كملنا الثلاثين الف بتوع المحل نبطل بقي اللعبة دي قبل ما ننكشف
دواهي – لسة محتاجين كمان 10 الاف ندفعهم عربون عربية نص نقل عشان البضاعة
حنورة – طيب ياللا نشوف كام زبون كده يكون ضاربهم السلك عشان ناكلهم قوام قوام و نخلص
( في هذه المرة يعرض اهل المريض 6 الاف فقط ثلاثة قبل العملية و 3 بعد العملية )
( قبل العملية كالمعتاد يطلب الطبيب مقابلة دواهي فتاتي ملتاعة )
طبيب – خبر مش كويس
دواهي = ( في لهفة ) : جوزي ماله ؟!
- عنده كلية تعبانة
= (تشهق ): صدمة
- شفناها في الاشعة
= ( في خبث ): انهي فيهم ؟! اليمين ؟!
- لأ الشمال
= لأ اليمين انت ماخدتش بالك
- باقول لك الشمال --- الكلية اليمين تعبانة رخرة بس بنسبة واحد علي عشرة من الشمال --- الشمال معظها متليف فيها كمية من الحصا و الزلط يبلطوا شارع بحاله
= هي مالها قلبت غم كده ليه ؟
- انا موش فاهم ازاي كان ساكت علي نفسه المدة دي كلها ما كانش بيشتكي من البول ؟ ما كانش بيحس باي الم؟
= عمرة ما قال أي
- و ال كان جاي يتبرع بكليته ال !! ده لازم يتعالج فورا
( تتجه الامور بدواهي و حنورة في تجاة مغاير تماما فيستنجدان بالدكتور حازم )
د. حازم – انت اهملت في علاج الكلية اليمين دي من يوم ما اكتشفنا انها تعبانة فاكر؟!
=( في حسرة ) فاكر يا دكتور
- و الظاهر ان جسمك عنده استعداد لتكوين حصا رمل و ده اللي حصل للكلية الشمال
= انا تعبان اوي يا دكتور
- طبعا لانك اتاخرت و الكليتين عندك كفائتهم بتقل بسرعة
( يفشل الغسيل الكلوي في علاج حالة حنورة التي تتدهور سريعا و تصبح هناك ضرورة لزرع كلية و لكن اين يجد متبرع له فصيلته النادرة نفسها ؟!)\
د.حازم – موجود واحدة ست
حنورة – الحقنا بيها يا دكتور
د.حازم – كانت سايبة لي تليفونها و عنوانها اتصلوا بيها انتوا
( و لم تكن هذه السيدة سوي تفيدة نفسها فتتصل بها دواهي و ما تصل تفيدة الي نزلها و تراهما حتي تتذكرهما علي الفور بينما دواهي و حنورة لا يبدو عليهما انهما يذكرانها لعله بسبب حالة القلق و التوتر التي يمران بها او لكثرة من قابلاهما خلال الشهور السابقة فاختلطت عليهما الوجوه و بعد السلام و الترحيب تندفع تفيده قائلة ):
- انا ارفض اني اخد فلوس ثمن كليتي اللي حاديها لك
حنورة – (في تاثر ) الله يبل ريقك
تفيدة – و انا طبعا حاسة بظروفكم
دواهي – اصيلة بشكل
تفيده – انا بنقذ حياة انسان اخ لي في الانسانية و في مقابل التضحية دي لايمكن اقبل اكتر من هدية رمزية سوفينير
دواهي – احنا تحت امرك
تفيدة – 40 الف جنيه
دواهي ( تشهق ): كام
تفيدة – احنا لسة علي البر سلامو عليكم ( تهم بالخروج )
حنورة – استني بس ما تبقيش عصبية كده
دواهي – ما تسيبها تروح مطرح ما تروح و للا مطرح ماهي عاوزة
حنورة – ابقي انا اللي ح اروح مطرح ما انتي عايزة ما انا عارف انك عاوزة تخلصي مني اسمعي يا ست تفيدة احنا كل اللي حليتنا 35 الف جنيه
تفيدة – زي بعضه
دواهي – نعم نعم !!
تفيدة – الفيديو بتاعكم ده حلو اوي تصوروا ماعنديش فيديو !!
دواهي – لأ ده ابتزاز بقي
تفيدة – و الواد ابني لازم يتكسي في الشتا
حنورة – ( في دهشة ) : غريبة
تفيدة – عاوزين قرشين لزوم السفر لاسكندرية عشان اودع اهلي قبل العملية
حنورة – انا سمعت الكلام ده فين ؟
دواهي – قولي يا ست انت احنا اتقبلنا قبل كده ؟!
تفيده – يا مساء الكلاوي
دواهي – ايوة افتكرت هو انتي !!
حنورة – مفيش فايدة ادفعي لها اللي هي عاوزاه كل اللي كلناه بط بط ح نرجعه وز وز
[email][/email]
| |
|
